يعني ايه امانة
يعني لما تكون مع مجموعة وشايف انهم محتاجين نصيحة اومساعدة متبخلش عليهم بيها. مش مهم ممكن يكون كلامك مش في مصلحتك او ضد هواك بس المهم انك متضيعش الامانة اللى ربنا امنهالك.
يعني لما تكون إمام لمجموعة من المصلين او حتى واحد منهم , اوعى تسيبهم دون النصح ليهم وانك توجههم وترشدهم للحق اللى علمته من الله وامنك عليه. اوعى تبطل تدعيلهم وانت في صلاتك معاهم او وهما غايبين.
يعني لما تكون مع مجموعة من زمايلك رؤساء او مرؤوسين اوعى تسيبهم من غير ما تقول رايك وخصوصاً لو كنت فاهم الشغل او هتساعدهم بيه. خليك مركز دايماً انك بتساعد اللى اقل منك في التعلم و تساعد اللى اكبر منك انهم يأدوا المهام المطلوبة منهم. دي أمانة ربنا ادهالك لازم تحافظ عليها.
كل ما زاد الناس اللى بيعتمدوا عليك علشان انت أمين اهتم انك تؤدي الأمانة كما يجب. وخليك رقيب نفسك وخليك عارف أن ربنا عليك رقيب ومطلع.
وخليك فاكر ان قدوتك دايماً نبينا محمد صلى الله عليه وسلم وانه من شدة امانته استؤمن على خبر السماء ( الدين ) اللى احنا عايشين بيه ده دلوقتي. والانبياء من قبله. ودي يا ابني سنة الله في خلقه ان يختبر الناس على قدر ايمانهم. وحفظ الامانة من الاختبارات اللى محتاجة منك جهد لحفظها وشكر لله انه قدرك انك تحفظها لحد اللحظة اللى انت عايشها دلوقتي.
لو نسيت او غفلت او ضيعت امانتك في اي وقت ارجع وشيلها تاني لأن وقتك لسة مخلصش وربنا – من رحمته – مقبضكش وانت مضيع للأمانة. اوعى تكسل او تسوف لأن الوقت اللى بتجيلك فيه الرسالة دي او التنبيه ده غالي. ربنا ألهم بيه انسان كتبه وهيألك كل الظروف والوسائل والامكانيات علشان يوصلك وتدركه كمان في اللحظة دي. ممكن الفرصة دي متتكررش تاني وموتك على حالك ده دلوقتي يكون هوه الرسالة اللى هتتبعت لشخص تاني.
ركز الامتحان لسة مخلصش طول ما انت لسه فيك نفس. ربنا يحفظك ويرعاك ويثبتك على الحق.
اللهم صل على محمد وال محمد